السلام عليكم
الناس لي راهي تقرا في الجامعة و مالقاتش خدمة و مكانش مصاريف و إلخ...
نحكيلك عن تجربة تقدر تخدم ليزاكسيسوار تاع تلفونات، تسلع ب 800 الف و تبيع فيها خدمة ربي يبارك، تخدم الاسواق تاع ولايتك و لا عدت فحل مين ذاك اخرج لكاش ولاية خلاف و اخدم ربي يعاونك...
كاين السوايع ولا الريحة ولا المسك تقدر تخدم تبيع على برا ولا لولاد حومتك صحابك لي يقراو معاك إلخ....
كاين لماعن (طباسا ،porte manger ، كيسان) ثاني تسلع و تخدم ف السوق ولا كاش سونطر كومرسيال...و لي عندو باه يتحرك يخدم الڤاطو سوا ف الجوامع ولا في السوق و زيدلها لانچات و الصابون و عفايس هكذاعلابالي بلي كاين بزاف لي تجيه عيب ولا يحشم يطرح برا و تبانلو كلي الناس يحڤروه و منا....، خاوتي الخدمة اي مافيهاش عيب أيا كانت ما دام في الحلال ،وما تواضع عبد لله إلا رفعه، و لي يخدم في السوق خرمن لي يطلب و لا يسرق ولا يسلف من عند الناس و يخرج عليهم الطريق " لأَنْ يَأْخُذَ أَحَدُكُمْ حَبْلا ، فَيَأْتِي بِحُزْمَةٍ مِنْ حَطَبٍ فَيَبِيعَهَا ، خَيْرٌ لَهُ مِنْ أَنْ يَسْأَلَ النَّاسَ أَعْطَوْهُ أَوْ مَنَعُوهُ "و زيد انت عندك مشروع في راسك ما يهمكش ف هدرة الناس ولا كيفاه يشوفوك بصح نهار لي تنجح تشوف عقلية الناس كيفاه تتبدل معاك...
الخدمات لي قلتهملكم اكل جربتهم و كاين لي خدموهم صحابي و فيهم فايدة من 150 /200 و طلع....
أتكل على ربي و ابدا ربي يعاونك
#منتديات_خليل_فكرة
