مشاريع و أفكار
 
islam
2019-08-08
 
 

الربح من التطبيقات
جيت ليوم نهدلكم شويا على مجال التطبيقات فالجزائر . كيما العادة المجال الوحيد اللي ماعندو حتى قاعدة جماهيرية هنا و ماعندو حتى داعم مع دلك هناك شركات متفردة بالمجال و تطبيقات قليلة جدا و بالتالي دخل كبير - نفسهم كيما يسير ووصلني و امير رغم انها جديدة الا انها مازالت تخدم و تدخل فقط لانو اي وحدة منهم لم تحتل كامل السوق - يعني تنجم تدير تطبيق تسميه منجلني يخدم في ولاية مازال مادخلولهاش ههههههه.المهم ارواح نحكيلكم على تجربة شخص في هدا المجال هادي يومين باع التطبيق تاعو بشكل كامل و انتقلت كامل صلاحياتو للمشتري الجديد اللي هيا سوسيتي فرنسية بسعر ربي اللي عالم بيه يتكون من 7 اصفار . رايح نحكيلكم كيفاش بدا و كيفاش وصل . ايا نبداو .الشخص هدا متخرج بشهادة في علم النفس اول حاجة و مبرمج تطبيقات . الله يبارك سيد خشين في راسو و قاسح تاني ههههههههه .المهم واش يدير خدم تطبيق تاع علم نفس كيما فايسبوك يعني منصة تواصل اجتماعي لكن للمرضى النفسيين . اصبر نفهمكم بالعقل . كل ما تدخل نتا للتطبيق عندك صفحة تجمع معومات عليك . مثلا كيف حالك اليوم ايا تختار رقم من 1-10 سؤال ثاني مثلا هل تشعر باكتئاب و تختار 1-10 . يعني كل يوم يمدلك سؤال بسيط فالبدية و يجمع عليك معلومات كبيرة جدا . زيد في اول اشتراك ليك و بعد كل شهر كاين كيما يقولو تاتست يجي فيه حوالي 100 سؤال تختار ارقام من 1-5 حسب كل سؤال . و هاد التاتست يدرس التحسن تاعك على مدار اشهر . درك اتخيل يكون عندك معلومات نفسية جد قريبة تاع بزاف ناس واش قادر تدير بيهم . اول حاجة و هي الاهم انو الطبيب النفسي تاع هداك المريض يولي عندو صلاحية يوصل لهاد النتائج طبعا بعد الادن باه يولي يشوف الارقام و الاحصائيات و النتائج بشكل عملي وين تقدر تساعدو في تحسين العلاج و حتى في اكتشاف المشكل بسرعة و اكثر فاعلية . زيد كاين نقطة مهمة هي تخلي الناس اللي متشابهين يتعارفو معا بعضهم البعض و بفهمو بعضهم اكثر و يعرفو انهم ماراهمش وحدهم . زيد كاين فالتطبيق الية الدكاء الاصطناعي . تقولي واش فايدتها . شوف كي تكون تكتب مثلا منشور فلتطبيق و رايح تنشرو كاين خوارزميات تدرس احتمالية انك تكون مكتئب و قادر تدير حاجة فروحك مثلا الانتحار. التطبيق واش يدير يطلعلك باجة مباشرة فيها ارقام تخدم 24/24 يجاوبوك ناس مختصة ويساعدوك لتجاوز الحالة . زيد فيه الية تدير جلسة مباشرة عبر التطبيق تقولي علاش يعني واش فايدتها . بزاااف ناس تبغي تروح عند البسيكولوج و يحشمو هنا كي تولي نتا فبيتك مبلع الباب و تهدر معا الطبيب يمكن ينحي عليك الخوف و الرهبة و الحشمة عبر الوقت . المهم ماللخر تطبيق اقل ما يقال عنو انو اللي خدمو عبقري و الاهم انو خدموه زوج هو و صديق ليه قاري رياضيات هو اللي دارلو الخوارزميات و شكوبي و امور كدا منا و ملهيه .عندك بالكم كي خدم التطبيق بشكل كامل شفعلو هدا و دار بيه نجاح ? ابدا . 6 اشهر و التطبيق موجود فالبلاي سطور و لا واحد سمع بيه و لم يحدث اي ضجة و مادار حتى نتيجة تحميلات قليلة حوالي الفين او ثلاثة و انتهت القصة . رغم كل الاشهار اللي دارولو لاشيء . واش يدير... بدا يتصل بشركات فرنسية و ايطالية حوالي شهرين ارسل اكثر من 500 رسالة ليهم وين فهمهم بالتفصيل الفكرة و انو كلشي جاهز يعني ماعنديش برك الفكرة عدي تطبيق كامل متكامل برك الاشهار و كيفاش تلحقوه مانجمتش وحدي . ردت عليه شركة فرنسة مختصة فالمجال الصحي و التطبيقات الصحية . علابالك واش قالتلو لازم نتقابلو وجها لوجه . ههههههههه بغا يبكي مسكين ماكانش كيفاه يطلع لانو ماكانش عندو فيزا دار توكيل لواحد من العايلة و هو راح عندهم و حكاو حكاو حكاو . ماصرا والو ماتفاهموش لاسباب هداك ماكانش فاهم مليح و الاخرين يحوسو حل و عقد مليح ليهم . فاتو الايام زادو تواصلو و فهمهم مليح و اتفقو يمدلوها فرصة اخرى و التقى بالمدير في تونس و تفاهمو على كلش و ابرم العقد و اشترو التطبيق و هو اشترى دار هههههههه كل يوم ندعي عليه في بلاصت مادير مشروع شرا دار ولا علينا .

#منتديات_خليل_فكرة

 
 
 

 
 
 
 
يرجى تسجيل الدخول كي تتمكن من الرد
 
 
 
 
 
 
آخر المواضيع
 
آخر المجموعات
world news
هاته المجموعة تطرح مشاريع وأفكار من الواقع و بطرق مبسطة و عن تجارب شخصية ..
مجموعة تهتم بالصيدلة وكل ما يتعلق بها
مجموعة مختصة بالقصص
مجموعة مختصة في طرق الربح من الانترنت
مجموعة تهتم بجميع دروس و ملخصات و امتحانت مع التصحيح لجميع المستويات
تهتم بكل ما يخص الموظفين ونقل الأخبار المتعلقة بهم من مديرية التربية بالجلفة
التحضير لبكالوريا الجزائر شعبة علوم تجريبية
سوق لناس الجلفة لطرح سلعهم بغرض بيعها أو شراء سلعة ما ..
سوق للسطايفية لطرح سلعهم بغرض بيعها أو شراء سلعة ما ..
 
الخصوصية
المواضيع والردود المنشورة في الموقع تعبر عن وجهة نظر أصحابها فقط !
جميع الحقوق محفوظة لمنتديات خليل © 2018
للإتصال بنا :
[email protected]