تفاصيل مشروع قاعة ألعاب
شحال تحتاج نتا وواش باغي . مثلا بلاي 4 راهو يدير 40-47 جديد . نتا تنجم تهبطهم مالخارج كاين ديزوكازيون تاع 150 - 180 اورو . ماكالاه تدير بلاي 3 . اخدم برك 4 و ماكلاه ايكسبوكس تاني - نحكيلك تجربتي و قادر تبدل واش تحب -
اقل شيء تحتاج 4 . لكن الاحسن تدير 6 باجمالي 30 مليون
تحتاج 6 تيلي . كاين على كل سومة مي نقولك اختار على حسب الحانوت لانو ادا كان الحانوت مظلم اي تلفاز يخدملك و ادا لالا و فيه الضو يدخل لازملك تلفاز مليح .
6 بلاي ديرها وحد 20 تاع تيليات بمتوسط 3 ملاين للواحد
لانسطالاسيون كاملة بالخيوط و التنظيم تجيك وحد المليون
الحانوت نتا و كيفاه باغيه يكون من 3 ملاين حتى 10 تزيين و تزيد
الكراسا ملاح انهم رخاس باه يقعدو لكن نقولك يحركوهم بزاف و يكسروهم و الاهم كي تكثر الحركة يكتر احتمالية يهرسولك المانيطات يولو يقربو الكراسا فبلايص بيزار و كي يزعفو يوقفو و الكرسي يرموه. دير ليفوتاي ماللخر شويا غاليين لكن تربح بزاف امور ماكانش كيفاه يحركوه و كي يتقطعو لانهم رايحين يقطعوهملك هادي رسمي بدلهم بعد مدة كي تكون دخلت فالربح .
المهم محل تاع 6 بلاي 4 جداد يجيك وحد 70 بكلش و ادا تدير 4 احسبها .
نروحو للدخل بارتيا تاع 12 دقيقة كاين اللي دايرها 30 دج لكن معظم الناس دايرتها بين 40-50 دج . يعني كل بلاي عندك فيه حوالي 3 بارتيات بعد مايختارو ليكيب و التشكيلة .
3 * 6 راك ف 18 بارتيا فالساعة كاقصى حد تقدر توصلو
تخدم مثلا 6 ساعات برك راك ف 108 بارتيا بسعر 50 دج راك ف 5400 دج
ديرلها نسبة -20% هي 1080
يعني تخرج بمتوسط 4000 فالنهار . دير فبالك الاهم فهاد المجال هو السناكس شيكولا ليجو الحلوى الشامية القاوقاو . يوسخولك الحانوت هادو بزاف مي فيهم دراهم .
احسبلها الضو و كامل النفقات تخرج بربح بين 7-11 مليون فالشهر
و كلشي يزيد و ينقص

#منتديات_خليل_فكرة