مشاريع و أفكار
 
islam
2019-08-08
 
 

السلام عليكم، قررت ننشر بعض المعلومات ودراسة قمت بها تع واحد المشروع يمكن بعض الناس تستفاد او تدي فكرة او الهام، المشروع هو الموزعات الآلية تع المشروبات والقهوة والسناكس، طبعا انا كي درت الدراسة في الولاية تاعي المشروع غير ناجح لأنها ولاية صغيرة وكاين لي عندو الأسبقية في هاذ المشروع، لكن في ولايات اخرى مزال كاين فرص على ما أعقتد، تفرجت الكثير من الفيديوات يوتوب وقريت ارتيكل يهدرو على هذا المجال، بش يولي المشروع مربح اولا لازم تحط موزعات في عدة نقاط، كل ما زادو النقاط تنقص لي شارج والمشروع يولي مجدي ومربح أكثر، النقاط لازم يكون فيها ترافيك بشري معتبر، اول مثال يأتي في البال وربما الكثير شافوه هوا فالجامعة، الموزع كان يفرغ على الوحدة تع النهار أحيانا ويجي يعمرو نص نهار، المستشفيات والمصحات، المحطات البرية، المجمعات السكنية المغلقة مثلا 4 ليتور فيهم 280 بارتما دير واحد لثما خير ربي، الاقامات (تع البنات خخخخ خاطر تع الذر يدوها ما تلقاهاش) الادارات الكبيرة، المهم وين يجي غاشي كبير والغاشي هذا ينتظر مدة من الزمن، المهم اختيار المكان هو المفتاح ومن المستحسن تكون أنت الوحيد لثما (الادارات والمستشفيات والمصحات ما يقدرش يدير كيوسك ولا حانوت لداخل)، طبعا لازمك تصريح بش تحطها وتخلص سعر رمزي حق التريسيتي (هاذي ما عنديش معلومة او تفصيل عليها) لكن البريفي بانتلي رح تزيدلو في قيمة البزنس تاعو يعني نورمالمو هوا ماذابيه، الفايدة تاعك فالقهوة الحليب الماء القازوز العصير شيبس كوفريط مادلين الخ المشروبات تدي فيها أقل حاجة ألف فرنك، وانت وش تحب تحط، طبعا نصل الآن للسلعة واللي هيا الموزع، شفت هنا في الجزائر الموزعات غالية وما فيها والو، الصورة لي حطيتها من موقع alibaba الشنوي، الماشينة كومبو فيها مشروبات ساخنة قهوة وحليب وشاي الخ، وسناكس كلا معا بعضها في ماشينة وحدة، سعرها بسعر الصرف في البنك 35 مليون، نقولو رح تشري 5 ولا 6، تشوف كش مستورد يجيبهالك هيا بالذات، باحتساب سعر النقل والضريبة وفايدتو هوا يمكن تلحق ل 90 مليون، يبقا سعر مليح لهنا 70 مليون تع القهوة وحدها فواد كنيس، والمزايا تع هذه الآلة كثيرة جدا، شاشة 17 انش تقدر تحط فيها اعلانات تمشي على مدار الساعة، تكونتاكي كوكاكولا موبيليس اوريدو سوفاك بن عمر قهوة منعرف شكون الخ، وزيد كاين صورة ستاتيك ثابتة دير فيها اعلان ثاني، والميزة لي تفيد أكثر هيا جاستيون تع ستوك en temps réel يعني تربطها معا كلي انترنت وتعرف في اي لحضة من اي جهاز قداش بعت وقداش مزال وشيا الحاجة لي نقصت، يعني هاذي تنحي عليك تعب كبير وعشوائية، كي تكون رايح تشارجيهم علابالك كل مشينة وش خاصها، وكون تفرغ وحدة نص نهار تعرف وتروح تعمرها ثم ثم بش ما يروحش الوقت هكاك، ومام الا حطيت خدام ولا شريك ما يسرقكش خخخخ، المهم انا خممت ندير المشروع هذا في المطار الجديد لكن مستحيل راكم علابالكم المعارف والكرا بقداه لثما وكون تحط انت الموزع المطاعم ما عادش يخدم تسما هما بعد يوقفولك كونطر، تالي ربعة موزعات فالمطار خير ربي خخخ رجعت للواقعية وفقت من النوم، مالقري المطارات كلا فالعالم فاها الموزعات الآلية غير مطارنا الراشي، وزيد فالمطار دير الموزعات كامل كيما الموزع تع الأنترنت لي حاطو فالصورة دير انترنت 100 ميغا فيبر اوبتيك بزوز ملاين ونص طبعا هاذي انت والدراسة تاعك القور يحتاجو الانترنت للخدمة في المطار يقدر يرفع ولا يحمل ملفات الخ مشي طروا ميل فايس بوك خخخ الجهاز سهل الاستعمال جدا، تلصق البورطابل فيه تكونكتي فالويفي يقلك حط عشرالاف تحطها يقلك كونكتي تربح يبدا العداد يحسبلك ساعة ولا نص ساعة الخ، تقدر الا جاتك فكرة تحطو في بلاصة اخرى ودير انترنت 4 ولا 8 ميقا على حساب احتياجك، كاين وحدة شحن الهواتف، ميزان يعطيك ضغط الدم الدهون الطول، فوتوي تع ماساج الخ الخ الخ. المهم علابالي طولت كل واحد راو ادرا بالامكانيات تع الولاية لي ساكن فيها. أرجو اني افدكم ولأي استفسار راني فالخدمة.

#منتديات_خليل_فكرة

 
 
 

 
 
 
 
يرجى تسجيل الدخول كي تتمكن من الرد
 
 
 
 
 
 
آخر المواضيع
 
آخر المجموعات
world news
هاته المجموعة تطرح مشاريع وأفكار من الواقع و بطرق مبسطة و عن تجارب شخصية ..
مجموعة تهتم بالصيدلة وكل ما يتعلق بها
مجموعة مختصة بالقصص
مجموعة مختصة في طرق الربح من الانترنت
مجموعة تهتم بجميع دروس و ملخصات و امتحانت مع التصحيح لجميع المستويات
تهتم بكل ما يخص الموظفين ونقل الأخبار المتعلقة بهم من مديرية التربية بالجلفة
التحضير لبكالوريا الجزائر شعبة علوم تجريبية
سوق لناس الجلفة لطرح سلعهم بغرض بيعها أو شراء سلعة ما ..
سوق للسطايفية لطرح سلعهم بغرض بيعها أو شراء سلعة ما ..
 
الخصوصية
المواضيع والردود المنشورة في الموقع تعبر عن وجهة نظر أصحابها فقط !
جميع الحقوق محفوظة لمنتديات خليل © 2018
للإتصال بنا :
[email protected]