مشاريع و أفكار
 
islam
2019-08-07
 
 

السلام عليكم خاوتي نتمنا تكونو كي العادة بصحة جيدة ... بدون اطالة رايح نحكيلكم على تجربتين لي كي العادة فالتجارة الالكترونية لكن ماشي البيع والشري لالا هاد المرة رايح نحكيلكم على ربح المال من مواقع الانترنت (صدقني قادر يوصل الربح لالاف الدولارات بافكار بسيطة ) و كيفاش تربح الدراهم من التطبيقات بلا ماتكون تعرف تبرمج نبداو خاوتي...1-المواقع
خاوتي هاد المجال راهو بحر دونك نتا و قفازتك قادر انا نكون غالط و قادر الاخر يكون غالط لهدا اقرا تجربتي و شوف وش يفيدك و وش يضرك . كان عندي سيت تاع تورنت الانمي . وش هو التورنت !!! نظن معظم الناس تفهمه هو وسيلة باش تحمل اي حاجة عبر الانترنت و تقدر تطفي البيسي و غدوة يكمل التيليشارجمون عادي . وش هو الانمي !! هو مجال الرسوم المتحركة اليابانية . ادا كنت تحبهم رايح تعرف انو ففترة شويا قديمة كان كاين نقص كبيير فالتورنت العربي تاعهم لحد الان مزال هاد المشكل و نقول العربي لانو الانجليزي كاين بزاف . انا وش درت خاوتي ? شريت ار دي بي وش هو هاد الشكوبي !!! هادا مجرد حاسوب تكريه يكون بمواصفات قوية و انترنت سريعة و قمت بترجمة الانمي باللغة العربية - سهل جدا الترجمة تجيبها واجدة من موقع سوبسان ونلصقها . كنت نترجم حوالي 3 انميات كل يوم فظرف شهرين وصلت ترجمت حوالي 100 انمي . رفعتهم ل ار دي بي و ديرت الامور التقنية تاعها و حليت سيت ينجم اي واحد يتيليشارجي الانمي بالعربية تورنت بلا ماييسجل و بلا مايقلب راسوو بلا اضغط هنا و هنا . الموقع كان بسيط و سهل و شباب . و السبب انو كاين موقع بنفس التجربة اسمو تراكر الانمي لكن الدخول ليه بالدراهم ماشي باطل كيما تاعي لازم تخلص 25 دولار . كنت نخدم معا الخليجيين خاوتي يحبو بزاااف هاد الصوالح و يتيليشارجيو بزاف لان الانترنت عندهه طيارة . و ديرت اشهارات فالموقع تاعي كنت فالنهار ندخل حوالي 6-15 دولار... فالشهر حوالي 250 دولار بلا اي تعب مور هادوك الشهرين . كل الامور التقنية من الاستضافة و الدومين و ار دي بي ستقامولي فالسنة حوالي 7 ملاين يعني كل سنة لازم تجدد . و انا فالشهر كنت ندخل 250 دولار يعني شهرين كنت رديت دراهمهم و ربحت 10 شهور صافية حوالي 2500 دولار . هدا مثال بسيط قادر تحل اي موقع و تدير اي حاجة لكن الاحسن الافلام و الالعاب و الانمي و المسلسلات ولا الفايرال - هدا نديرلكم موضوع عليه قريبا -2-التطبيقات
هاد المجال ضحكة حق ربي غير ضحكة ساهل لوحد الدرجة انو الناس ماسامعاش بيه . نعرف ناس تدخل الالاف و الالاف من الدولارات منو فالشهر عادي . ادا كنت مبرمج خويا و تفهم مليح ننصحك تعاون معا مصمم و اخدم لعبة و لا اخدم تطبيق و هنا نتا و الفكرة تاعك و ادا ماتعرفش ماشي مشكل كاين بزاف مواقع تنجم تخدم بيها تطبيقات بلا ماتعرف اي حاجة فالبرمجة . درك تقولي وش ندير بالتطبيق ...رايح نفهمك وش تدير بيه !!! -نمدلكم مثال تاع تطبيق طبخات ووصفات - هادا مثال بسيط بكون الوالدة تاعي تخدم بيهم هاد التطبيقات تقولي باطل مانشريهاش ادن كيفاش الناس تدخل منهم الدراهم ? نقولك كاين حتى فالتطبيق اشهارات و تدخل بيها اكثر حتى من الموقع .كل مستعمل للتطبيق يظهرو الاشهار نتا تدي نسبة و المليح هنا انها نسبة مليحة شويا رغم اننا جزائريين . نتا تخدم تطبيق سطوندار بسيط جدا تاع مثلا مئة وصفة فيه برك التصاور و الكتبة و لا تاع 100 تسريحة اطفال و لا تاع مئة لغز و لا مئة نكتة جزائرية .... تشوف الفكرة تضحك ههههه و هاد السبب اللي قتلك انو ضحكة اخدمها و ارفعها لبلاي ستور و انشر الليان تاعها فكل مكان و هنا ترجع ليك و الاشهار ...و الاحسن انك تدير عليه فيديو فاليوتيوب تعرف بيه مثلا تدير فيديو احست 10 تطبيقات لسنة 2019 و تدخل التطبيق تاعك وسطهم . هادي كيفاش تربح من تطبيق بسيط .
في حالة يكونو معانا ناس كراك في مخهم و يخدمو مليح ننصحهم بمجال الالعاب و نفهمهم ....كاين حاجة اسمها الشراء في التطبيق اللي مثلا تكون تلعب و لازملك الدهب باش طلع السطاج بلخف تروح تشريهم بالدراهم هادي وحدها قادر تدخلك الملاين . كاين حاجة اسمها سي بي اي معناها فالتطبيق تاعك تقولو ثبت هدا التطبيق لتواصل هو يتثبتو نتا تربح نسبة من الدراهم . كاين مثلا انو تدير 50 سطاج الاولين باطل و 50 سطاج الثاني لازم يشريه . اتعاملو مع الاجانب ولا الخليجين ....خاوتي نهدرلكم على الجزائريين الغالبية والله مايفهمو مليح يعرفو فايسبوك و انستا و سناب و تيكتوك ... استغلو هاد الفرصة لانو قريب يدخل وقت الناس تولي تخدم بالبطاقات البنكية و ينحلو بيبان كبااااااار . ديرو لاباز من درك اتعلمو مليح و لا وجدو الفكرة و شوفو كيفاش تجسدوها فعالم الواقع حتى لوكان جاتك بسيطة سييها . و ادا كاش واحد قرر يخدم موقع و لا تطبيق و مايعرفش من وين يبدا يكونطاكتيني نوريه كلشي بالتفصيل كوني نعمل فهاد المجالرايح كل مرة نحكيلكم على حاجة جديدة فالتجارة الالكترونية حكيتلكم على كيفاش تجيب السلعة و تخدم لاكارد بايسيرا و العملات . و اليوم على الربح من المواقع و التطبيقات . و قريبا نحكيلكم مواقع الفايرال و الدروبشيبينج و امازون اف بي اي و مواقع تقديم الخدمات كيما خمسات ....

#منتديات_خليل_فكرة

 
 
 

 
 
 
 
يرجى تسجيل الدخول كي تتمكن من الرد
 
 
 
 
 
 
آخر المواضيع
 
آخر المجموعات
world news
هاته المجموعة تطرح مشاريع وأفكار من الواقع و بطرق مبسطة و عن تجارب شخصية ..
مجموعة تهتم بالصيدلة وكل ما يتعلق بها
مجموعة مختصة بالقصص
مجموعة مختصة في طرق الربح من الانترنت
مجموعة تهتم بجميع دروس و ملخصات و امتحانت مع التصحيح لجميع المستويات
تهتم بكل ما يخص الموظفين ونقل الأخبار المتعلقة بهم من مديرية التربية بالجلفة
التحضير لبكالوريا الجزائر شعبة علوم تجريبية
سوق لناس الجلفة لطرح سلعهم بغرض بيعها أو شراء سلعة ما ..
سوق للسطايفية لطرح سلعهم بغرض بيعها أو شراء سلعة ما ..
 
الخصوصية
المواضيع والردود المنشورة في الموقع تعبر عن وجهة نظر أصحابها فقط !
جميع الحقوق محفوظة لمنتديات خليل © 2018
للإتصال بنا :
[email protected]